Животот со родителите повеќе не е исклучок, туку ново правило за голем дел од младите Австралијци. Според најновите податоци, просечната возраст на која младите конечно го напуштаат семејниот дом достигна 31 година, а главната причина cе високите трошоци за живот.
Сѐ поголем број млади Австралијци остануваат да живеат со своите родители и во триесеттите години од животот, бидејќи купувањето или изнајмувањето сопствен дом станува финансиски недостижно.
Истражувањата покажуваат дека кризата со достапноста на домувањето целосно ги менува животните навики на генерациите кои до неодамна се сметаа за финансиски независни. Наместо да планираат сопствен дом, многумина се принудени да останат во родителскиот дом, иако имаат редовна работа.
Експертите предупредуваат дека растот на цените на недвижностите, високите кирии и инфлацијата создадоа ситуација во која дури и лица со стабилни примања тешко можат да обезбедат доволно средства за депозит или месечна кирија. Поради тоа, животот со родителите повеќе не се смета за привремено решение, туку за економска неопходност.
Податоците од Австралискиот институт за семејни студии покажуваат дека бројот на млади кои остануваат во родителскиот дом постојано расте уште од 2006 година, а најголемиот скок е забележан по пандемијата на ковид-19. Трендот е присутен кај сите возрасни групи до раните триесетти години.
Социолозите оценуваат дека оваа појава веќе влијае и врз други животни одлуки. Младите подоцна стапуваат во брак, одложуваат создавање семејство и подоцна се одлучуваат за купување недвижност, бидејќи финансиската стабилност станува сѐ потешко достижна.
Во Австралија, но и во многу други развиени земји, живеењето со родителите постепено го губи некогашниот негативен предзнак. Наместо знак на неуспех, сѐ повеќе се гледа како рационална стратегија за заштеда во услови кога трошоците за живот растат многу побрзо од платите.
Економските аналитичари предупредуваат дека без значително зголемување на понудата на станови и мерки за подобрување на достапноста на домувањето, оваа генерација би можела уште подолго да остане во семејниот дом, а просечната возраст за осамостојување дополнително да се зголемува.
