Престон Македонија се победници на New Balance Dockerty Cup за 2026 година, откако во финалето на стадионот „Лејксајд“ со 3:1 го совладаа Хајделберг Јунајтед.
На совршеното сончево зимско време исполнетите трибини беа идеална сцена за големото финале, во кое Престон Македонија стигна до историски триумф и го освои повторно трофејот после 34 години.
Финалето започна со брзо темпо. Дом Фолино од Престон рано во натпреварот претрпе силен фаул, по што дојде до кратка расправија меѓу фудбалерите, што беше најава за возбудливата битка која следеше.
Голманот на Хајделберг, Јарен Созер, имаше многу работа уште од самиот почеток. Во првите пет минути мораше неколкупати да интервенира надвор од својот шеснаесетник, додека Престон Македонија се обидуваше да го искористи просторот зад одбраната.
Јамал Али беше еден од најактивните играчи во првиот дел, особено по десната страна, каде што со прецизните додавања создаваше проблеми за одбраната на Хајделберг.
Престон продолжи да биде опасен и од прекините. Во 20. минута, корнерот на Сиан Куба донесе одлична можност, откако неговиот удар се упати кон голот.
Сепак, и покрај силниот притисок на Престон Македонија, изненади Хајделберг кој прв стигна до водство. Николас Дуарте со маестрален потег изведе акробатски удар и ја затресе мрежата за 1:0.
Но навивачите на Хајделберг имаа малку време да уживаат во предноста, Престон Македонија веднаш возврати жестоко.
Лавовите постигнаа два гола во рок од пет минути и целосно го свртеа текот на финалето. Прво Зак Чианчи одлично го процени летот на топката и со прецизен удар со глава го постигна израмнувачкиот гол.
Само неколку минути подоцна, Стефан Зини беше најбрз по одбраната на Созер и ја смести топката во мрежата за целосен пресврт – 2:1 за Престон Македонија.
Така тимот успеа до полувремето да направи пресврт и со предност да замине на одмор.
Во второто полувреме Хајделберг тргна по израмнување. Во 64. минута изгледаше дека тие успеаа да стигнат до 2:2, откако Ајден Брајс несреќно ја испрати топката во сопствената мрежа.
Сепак, голот не беше признат. Помошната судијка Николетта Сотиропулос веќе сигнализираше офсајд, а беше проценето дека Бен Колинс имал контакт со топката од недозволена позиција пред таа да се одбие од Брајс и да заврши во голот.
Како што се приближуваше крајот, Престон продолжи да создава подобри можности, иако Хајделберг силно притискаше во потрага по израмнување.
Најблиску до гол за Хајделберг беше Кристијан Теохарус во 85. минута. Тој упати силен удар од далечина, но топката заврши малку над пречката.
Кога се очекуваше последниот свиреж, Престон Македонија го зададе конечниот удар.
Лука Тевере, еден од клучните играчи во средниот ред, се најде очи в очи со Јарен Созер и ладнокрвно ја смести топката во мрежата за 3:1.
Следуваше големо славје на трибините. Навивачите на Престон Македонија го прославија историскиот триумф, а тимот по 34 години повторно го подигна престижниот Докерти куп.
За Тевере, денот беше дополнително збогатен со индивидуално признание. По одличната игра и голот кој го реши финалето, тој беше прогласен за најдобар играч на натпреварот и го доби престижниот медал Jimmy Mackay.
Фудбалерите на Престон Македонија така ставија точка на незаборавниот ден со победа од 3:1 и со трофеј кој после повеќе од три децении повторно ќе го краси клубот.
