Минатава среда во организација на Џасинта Алан премиерката на Викторија, во Мелбурн се одржа свечената „Victorian Christian Communities Dinner 2026“, на која присуствуваа претставници на христијанските и другите верски заедници.
На настанот, Македонската Православна Црква – Охридска Архиепископија беше претставена од отец Гаврил и јереј Климент Станковски, кои беа единствени поканети претставници од македонската православна заедница.
Свечената вечера се одржа во „Centrepiece Conference Centre“ во Мелбурн и собра бројни политички претставници, верски лидери и претставници на различни христијански заедници. На настанот присуствуваше и министерката за мултикултурни прашања на Викторија, Ингрид Стит, а во своето обраќање премиерката Џасинта Алан ја нагласи важноста на верските заедници во зачувувањето на духовните и семејните вредности, како и нивниот придонес во градењето на хармонично и мултикултурно општество.
Средбата претставуваше можност за афирмација на духовните вредности, меѓусебното почитување и значајниот придонес што верските заедници го имаат во општествениот живот на Австралија и во градењето на меѓусебната доверба и соработка меѓу различните култури.
Во име на македонската православна заедница, претставниците на МПЦ-ОА изразија благодарност до Владата на Викторија и до премиерката Џасинта Алан за покажаната почит, вниманието и препознавањето на улогата што македонската заедница ја има во австралиското општество. Тие истакнаа дека македонската православна заедница со децении активно придонесува во духовниот, културниот и општествениот живот на Австралија, зачувувајќи ги македонските традиции, јазик и вера меѓу новите генерации.
Поканата и присуството на претставниците на МПЦ-ОА на овој значаен настан претставуваат уште едно сведоштво за видливоста, угледот и почитта што македонската православна заедница ги ужива во Австралија, како и потврда за нејзиниот значаен придонес во мултикултурниот развој на Викторија.
Ваквите средби потврдуваат дека верата, дијалогот и заедничките вредности продолжуваат да бидат мост на единство, разбирање и соработка меѓу народите и заедниците, особено во современото мултикултурно австралиско општество.
