Тврдењата дека Австралија „без никакво предупредување“ станала целосно безготовинска, дека сите четири големи банки го ограничиле подигањето готовина и дека владата повлекла банкноти во вредност од една милијарда австралиски долари, како и дека граѓаните не можат да подигнат повеќе од $500, не соодветствуваат со фактите.
Овие наводи се проширија на социјалните мрежи, но достапните податоци од официјалните институции и релевантните медиуми не потврдуваат ниту едно од нив.
Напротив, готовината и понатаму има статус на законско средство за плаќање во Австралија. Резервната банка на Австралија (РБА) во своите извештаи јасно наведува дека, иако употребата на готовина опаѓа поради растот на плаќање со картичките и дигиталните плаќања, банкнотите и монетите во австралиски долари остануваат во оптек. Пристапот до готовина и плаќањето се кеш сè уште се сметаат за неопходни, особено за постарите граѓани и за ранливите групи.
Падот на употребата на готовина, спротивно на тврдењата на интернет, не е ненадеен ниту таен процес. Станува збор за долгорочен тренд кој трае повеќе од една деценија и е предмет на бројни јавни анализи, статистики и регулаторни расправи, поврзани со промената на навиките на потрошувачите.
Наводот дека „сите четири големи банки“ вовеле ограничувања за подигање готовина исто така нема основа во фактите. Иако банките затвораат филијали или преминале на модели со ограничено ракување со готовина, нема докази за координирана или задолжителна мерка на ниво на банкарскиот сектор што би им забранувала на граѓаните да подигнуваат готовина над одреден износ. Постоечките ограничувања најчесто се однесуваат на поединечни банкомати, типови сметки или безбедносни процедури, а не на општа забрана.
Тезата дека властите повлекле од оптек банкноти во вредност од една милијарда долари исто така не е точна. Во официјалните изјави и документи нема одлука што би укажувала на таква мерка. РБА појаснува дека готовината редовно се повлекува од оптек исклучиво од технички причини – кога банкнотите се оштетени, истрошени или се заменуваат со нови серии со подобрени безбедносни елементи. Ова е стандардна практика во монетарните системи, а не чекор кон укинување на готовината.
Во јавните публикации јасно се прави разлика меѓу техничкото повлекување банкноти и демонетизацијата, односно укинувањето на важноста на одредени апоени. Демонетизацијата би подразбирала јавно објавена одлука, правен акт и преоден период за размена на парите – нешто што во Австралија не постои и никогаш не било најавено.
Слично погрешно толкување се јавува и кај тврдењата дека граѓаните не можат да подигнат повеќе од $500. Такво ограничување го прават банките и не постои во законите, ниту во регулаторните акти што го уредуваат финансискиот систем. Нема државен пропис што им забранува на граѓаните да располагаат со поголеми количини готовина.
Во пракса, можни се поединечни ограничувања зависно од банката, видот на сметката, техничките можности на банкоматите или интерните процедури за спречување финансиски злоупотреби. Сепак, регулаторната рамка во Австралија не предвидува општо ограничување за подигање готовина, а централната банка повеќепати истакнува дека зачувувањето на пристапот до готовина останува важен дел од финансиската инфраструктура.
