Австралиската авиокомпанија “Квантас“ објави дека има намера до крајот на 2025 година да го спроведе најдолгиот непрекинат комерцијален лет – од Сиднеј до Лондон што би траел 19 часа.
По пет години планирање, компанијата објави дека нарачала 12 авиони „Ербас А350-1000“ за така долги летови, како дел од програмата „Проект изгрејсонце“. Овие летови ќе почнат од Сиднеј до крајот на 2025, а потоа и од Мелбурн.
– Новите типови на авиони „А350“ и „Проџект Санрајз“ ќе го поврзат секој град со само еден лет од Австралија, изјави директорот на “Квантас“, Алан Џојс.
Тестирањето долги летови почна во 2019 година, меѓу кои и пробниот лет од 17.800 километри меѓу Лондон и Сиднеј, што траеше 19 часа и 19 минути. Пробниот лет меѓу Њујорк и Сиднеј, пак, долг 16.200 км., траеше нешто повеќе од 19 часа.
„Сингапур ерлајнс“ моментно го има најдолгиот комерцијален лет. Од тој град-држава до Њујорк се стигнува за нешто под 19 часа, а растојанието е околу 16.700 км.
“Квантас“ има и лет меѓу Перт и Лондон од 14.500 километри и трае 17 часа.
– Како што би очекувале, посебно внимание се посветува на дизајнот на патничкиот дел за да биде што поудобен за долг лет, изјави Џојс.
Новиот „A350“ ќе собира 238 патници, а првата класа ќе нуди посебен кревет, фотелја и гардероба.
