Саша Огненовски, е поранешен репрезентативец на Австралија и познат интернационалец, и од минатава седмица е новиот шеф на стручниот штаб на Мекартур Булс. Тој потпиша двегодишен договор со клубот и во А-лигата ќе го предводи тимот во сезоните 2026/27 и 2027/28.
За Огненовски ова е прв поголем тренерски предизвик во неговата кариера. Тој досега беше прв асистент во Престон Македонија.
Огненовски зад себе има богата и успешна фудбалерска кариера. За репрезентацијата на Австралија одигра 22 натпревари, а настапуваше и во странство, меѓу кои и во Јужна Кореја, каде што остави сериозна трага.
Најголемиот успех во клупската кариера го оствари со Сеонгнам Илва Чунма, со кој во 2010 година ја освои АФЦ Лигата на шампионите. Истата година беше прогласен за азиски фудбалер на годината, што е едно од најголемите индивидуални признанија за австралиски фудбалер.
Новата функција во Мекартур Булс претставува голем чекор во неговата тренерска кариера. Огненовски сега ќе има задача своето богато играчко искуство да го пренесе на еден од тимовите во најсилното австралиско фудбалско натпреварување.
Интересно е што Огненовски доаѓа на местото на уште еден Македонец – Миле Стерјовски. И тој е поранешен познат интернационалец и репрезентативец на Австралија, а беше прв тренер на Мекартур Булс од 2023 до 2026 година.
Стерјовски во периодот во кој го водеше Мекартур успеа да освои трофеј, а неговото заминување го отвори патот за уште еден тренер со македонски корени да застане на чело на клубот.
Така, Мекартур Булс и понатаму останува клуб со силна македонска врска. По Стерјовски, довербата сега му е дадена на Огненовски, кој ќе се обиде своето име од фудбалерските денови да го надгради и во тренерската професија.
Пред него е голем предизвик – да го консолидира тимот, да изгради конкурентен состав и да покаже дека може успешно да се снајде и во улогата на прв тренер на тим од А-лигата.
