Ако уште еднаш се одложи датумот, проевропските политичари сигурно нема пак да победат на избори
Претседателот Стево Пендаровски во интервју за „Euronews“ говореше за актуелни прашања поврзани со односите со Република Бугарија, па посочи дека сè уште се бори да најде оправдување зошто настаните што се случиле во далечното минато имаат толку несразмерно влијание врз судбината на неговите граѓани денес.
Тој се осврнува и на уморот околу интеграцијата во ЕУ, што е, вели, најлошо чуваната тајна во Брисел, но, посочува, постои умор и кај нас бидејќи 17 години сме со статус на земја кандидат за членство.
– Знаете, нам ни е преку глава од сите овие приказни дека сме географски дел од Европа. Би сакале конечно да бидеме институционален дел од Европа. Нема да се откажеме. Тоа е сигурно… Но, можам да ви кажам дека, доколку уште едно одложување се случи повторно, тогаш од јуни натаму проевропските сили и проевропските политичари или реформисти нема да победат на други избори во оваа земја – оценува Пендаровски.
Не можам да му објаснам на просечен македонски гласач или граѓанин колку е важно да влеземе во ЕУ, додава Пендаровски, организација основана во 1957 година, во 20-иот век – каква етничка припадност бил Гоце Делчев или некој друг херој-основоположник, како цар Самуил пред десет века.
Дебатата за македонскиот идентитет што доведе Бугарија да стави вето на пристапот на нејзиниот сосед во ЕУ влезе во третата година, а македонскиот претседател посочува дека сè уште верува оти новоизбраните премиери Кирил Петков и Димитар Ковачевски можат да го решат ќор-сокакот.
Тој потсетува дека Македонија веќе прескокна значителни пречки за да ја покаже својата посветеност за пристапување во Унијата со решавањето на спорот со Грција за името (Преспанскиот договор), за потоа да се јави прашањето со Бугарија.
Билатералниот договор за добрососедски односи од 2017 година, потпишан од премиерите Зоран Заев и Бојко Борисов, се сметаше за важен момент во постојано растечките позитивни ставови меѓу двајцата, потсети Пендаровски.
– И после тоа, одеднаш – сè уште не знам кој е главниот мотив кој стои зад тоа – почнаа да зборуваат за историјата, за тоа дека историјата е предуслов за напредок кон Брисел, и, можам да ви кажам дека сите ние на овој крај на овој политички јаз, или дискусија ако сакате, беа фатени во тесно и неподготвени… Дури и денес, навистина не сум сигурен за вистинските мотиви на нивната страна, зошто историјата беше толку важна за нив. Тоа никогаш не му се случило на ниту еден друг кандидат за членство во ЕУ – рече Пендаровски за “Еуроњуз“.
