Во салата на црквата „Св. Петка“ во Сиднеј се одржа промоција на две книги од Иван Трпоски: „Исповед кон мајка ми Љуба“ и „Од архивата на Македонското литературно друштво ‘Григор Прличев’“, во издание на истоименото друштво. Промотор беше проф. Катерина Ципушева, а програмата ја водеше м-р Душан Ристевски.
Настанот, организиран од МЛД „Григор Прличев“ привлече љубители на литературата од Сиднеј, Волонгонг и Њукастел. Во своето обраќање, Ристевски го претстави животот и делото на Трпоски, додека Ципушева ја истакна значајноста на двете книги за македонската литература во дијаспората и татковината.
Книгата „Од архивата на МЛД ‘Григор Прличев’“ (прво издание 2023) содржи обемен архивски материјал собиран повеќе од четири децении, а во Сиднеј беше претставено дополнето издание. „Исповед кон мајка ми Љуба“ е двојазично автобиографско дело посветено на мајката на авторот, збогатено со семејни фотографии.
По повод промоцијата пристигнаа честитки од бројни институции и јавни личности од Македонија и Австралија. Иван Трпоски е долгогодишен член и почесен член на Друштвото, активен како библиотекар, архивар и уредник, како и член на писателски и новинарски здруженија.
Автор е на повеќе поетски, прозни и публицистички дела и добитник на награди и признанија за својот придонес во афирмацијата на македонскиот јазик и култура во дијаспората.
