Со транспаренти, пеење на украинската химна, но и низ солзи стотина украински граѓани одржаа протестен марш низ Скопје и побараа да запре руската агресија врз нивната земја.
“Стоп за војната, стоп за агресијата, помогнете ѝ на Украина“, беа пораките што ги упатија учесниците на протестниот марш, што го организираше украинското здружение „Лесја Украинка“.
За Путин се извикуваше дека е фашист а на еден транспарент стоеше “Запрете го Путлер“!
– Не е нормално во 21 век луѓе да гинат за Путин да остане на власт, за да ја задржи власта со крвави раце од невините украински луѓе. Нашата војска е доволно спремна да се спротивстави. Но, повторно ќе кажам, дипломатијата треба да е на прво место. Да се реши овој конфликт на дипломатско ниво. Да запре војната, да биде мир. Мир во Украина, мир во Европа, побара претседателот на здружението, Олександр Урбанович.
Протестниот марш почна од плоштадот во Скопје и заврши пред зградата на руската амбасада, каде имаше засилено полициско обезбедување. Во протестот се приклучија и македонски граѓани.
