По својот 70-ти роденден на 31 октомври 2025 година, проф. Миле Терзиовски донесе одлука да се пензионира од редовната професорска позиција на Универзитетот за технологија Свинбурн, каде што осум години беше професор по претприемништво и иновации, а шест години ја извршуваше и функцијата раководител на Катедрата за бизнис технологија и претприемништво.
Сепак, неговата академска и истражувачка активност продолжува со несмален интензитет. Проф. Терзиовски е повторно назначен за дополнителен (Adjunct) професор во наредните три години, период во кој ќе продолжи со менторство на четворица докторанди, како и со раководење на значаен проект финансиран од Австралискиот истражувачки совет, посветен на примената на вештачката интелигенција и трансформацијата на малите и средни претпријатија.
Покрај тоа, тој и понатаму ја извршува функцијата претседател на Академскиот одбор на Crown Institute of Higher Education (CIHE) во Австралија, каде што оваа година одбележува десетгодишен јубилеј на оваа значајна позиција.
Во меѓувреме, проф. Терзиовски доби и ново значајно меѓународно признание. Тој беше поканет од лондонската платформа Henry Stewart Talks – еден од водечките глобални образовни ресурси за академската и деловната заедница – да подготви серија од десет предавања на тема комерцијализација на технологијата. Овие десетминутни презентации се веќе објавени во рамките на колекцијата „Бизнис и менаџмент“.
„Ова беше извонредна можност да се навратам на долгогодишното истражување и соработка со индустријата во областа на иновациите и комерцијализацијата на технологијата. Голема чест ми е што придонесувам заедно со водечките експерти во оваа област,“ изјави проф. Терзиовски.
Серијата опфаќа клучни теми како што се: вовед во комерцијализација на технологијата, пазарни истражувања и анализа, интелектуална сопственост, финансиски стратегии, развој на бизнис модели, стратегии за излез на пазар, регулаторни аспекти, стратегии за раст и проширување, предизвици во процесот на комерцијализација и изработка на патоказ за успешна примена на технологијата.
Уредникот на колекцијата „Бизнис и менаџмент“ од Henry Stewart Talks упати честитки до проф. Терзиовски, истакнувајќи: „Горди сме што сте дел од нашата група водечки светски експерти кои ги презентираат своите знаења и искуства.“
Со ова, проф. Миле Терзиовски уште еднаш го потврдува својот значаен придонес на глобално ниво во областа на иновациите, претприемништвото и технолошката трансформација.
