Македонскиот Просветно Училишен Одбор за НЈВ (МПУО) е непрофитна организација, која се грижи за изучување на македонскиот јазик во Нов Јужен Велс веќе 35години. 35 години им е достапен на илјадници Македончиња, чии што родители неуморно ги носат да го изучуваат македонскиот јазик и македонската култура.
Македонската заедница е пионер во зачувувањето на јазиците на заедниците во НЈВ. Пред 35 години, кога е формиран, по бројот на учениците во НЈВ Македонците беа на првото место. За тоа секако се одговорни родителите, нив треба да им се честита. Заслужни се и првиот претседател, Перо Кикереков, по него претседатели беа: Тоде Кабровски, кој 25 години го водеше Одборот, Ѓорги Ѓоргиев, Цвета Чумковска, Зора Јанева и Жаклина Михајлова, која е актуелен претседател на Одборот. Заслужни се и сите други членови на Одборот, кои низ текот на годините имаа разни задачи како потпретседатели, секретари, благајници, членови на школските одбори и многу други пријатели на македонскиот јазик. Во овие 35 години Македонскиот Просветно Училишен Одбор е оригинално организиран. Имено, под закрилото на МПУО работат сите етнички училишта во НЈВ, а се води грижа и за редовните основни и средни училишта каде што се изучува македонскиот јазик. Одборот ја координира работата на училиштата, ги вработува и доедуцира на специјални семинари учителите, се грижи за афирмирање и промоција на училиштата, за зголемување бројот на учениците. МПУО има подготвено соодветен Наставен план и програма за работа во училиштата, а наставата се изведува на три нивоа: почетен, среден и напреден курс.
Во текот на годината МПУО има неколку големи манифестации на кои се промовира македонскиот јазик, нашата култура и традиција и се всадува во учениците љубовта кон македонските корени:
Свечената Академија за Кирил и Методиј, на која се доделуваат награди за најдобрите ученици и поединци- волонтери во училиштата, натпреварот по рецитирање на македонски јазик во НЈВ, на кој децата од 5 – 12 годишна возраст рецитираат на македонски јазик и годишниот концерт , кој традиционално се одржува на крајот на учебната година, а на кој децата пејат, глумат и го покажуваат тоа што го научиле низ годината, матурска вечер на матурантите што го изучуваат македонскиот јазик, а МПУО доделува и една бесплатна карта за Македонија, за еден матурант, кој најмалку 5 години го изучувал македонскиот јазик во средното училиште. МПУО одржува часови по македонски јазик за возрасни. МПУО е врската помеѓу училиштата и Министерството за образование на НЈВ, како и врска со училишта од Македонија . МПУО издава учебници по македонски јазик, помошен материјал за учителките и за учениците. Работата на сите ентузијасти е доброволна, а Одборот е непрофитна организација и се финансира исклучиво од доброволни средства. МПУО е составен дел од Федерацијата за јазици на заедниците на НЈВ и учествува на сите државни прослави за образование.
Оваа година Одборот ја доби големата и престижна награда, Повелба на Македонија, што ја доделува претседателот на Македонија, Ѓорѓе Иванов.
Прославата на 35 годишнината на МПУО се одвиваше во три дена, а започна во петокот, кога гостите – учителки од цела Австралија имаа Семинар по македонски јазик, на кој ги изучуваа новите методи во наставата по македонски јазик, употребата на ајпед во класовите, а разменија и практични искуства меѓусебно. Главното предавање го одржа Алекс Де Принцио, советник во Министерството за Образование на НЈВ.
Во саботата се одржа традиционалната матурска вечер во прекрасниот амбиент во Emporium Reception во Bankstown во присуство на многу гости, родители и наставници се прослави матурската вечер. Вечерта им беа врачени дипломите на 22 матуранти за успешно завршено изучување на македонскиот јазик во средното училиште.
Вечерта присуствуваа: заменик – директорката на Саботните центри за јазици во НЈВ со своите соработници. И оваа година големо изненадување предизвика доделувањето на наградата авионска карта за Македонија. Среќата му се насмевна на Дилан Богдановски, која ќе патува за Македонија бесплатно. Врачувајќи ја наградата претседателката на Македонскиот Просветно Училишен Одбор, Михајлова истакна дека: “…изучувањето на македонскиот јазик е света работа. Со изучувањето на македонскиот јазик се изучува и нашата стара традиција и култура, а со тоа се едуцираат младите да си ги сакаат и почитуваат корените….“
Матуранти по македонски јазик оваа година беа: Андреј Јосифовски, Ангела Ничоска, Дилан Богдановски, Гоге Спасевски, Клеопатра Јовческа, Кристина Коруновска, Маја Мицевска, Натали Талевска, Памела Марковска, Стефани Недановска, Стивен Најдовски, Анабела Николиќ, Арна Лешанска, Даника Митревска, Димитрија Димитровски, Кристијан Трајковски, Натали Бакрданиковска, Стефан Божиноски, Теодора Димитрова, Изабела Бојковска и Кристина Николовска.
Централната прослава на 35-годишнината на Македонскиот Просветно Училишен Одбор се одржа во неделата, во Културниот центар “ Илинден“ , што се наоѓа веднаш до Црквата Света Петка во Рокдаел. Во преполнетата сала беше организирана одлична свеченост, достојна на јубилејот, со прекрасна изложба што ја подготвија учениците и учителките .
На сите свечености, како и на главната во неделата присуствуваа и Љубица Талеска, претседател на Учителската Асоцијација на Викторија, Кети Лазаридис- член на Управниот Одбор на македонското училиште во Перт,бЛидија Нарашанова Смилевска- советник по македонски јазик во Викторија, како и првите организатори на училиштата во НЈВ, Кире Пашовски, Панде Кондовски, Душко Марковски,Илија Велјановски- Чорба и многу сегашни родители, ученици и пријатели на македонскиот јазик. Присутните ги поздрави членот на Парламентот на НЈВ, Марк Кури, кој , меѓу другото истакна дека: “…..македонската заедница е значаен фактор во НЈВ и дека изучувањето на мајчиниот јазик е една од најважните работи што се организира во македонската заедница.
Поздравувајќи ги присутните , претседателката на МПУО , Жаклина Михајлова рече :
Нека ни е честит Празникот, Јубилејот 35 години македонски јазик во НЈВ. Господ да ни даде сила, разум, трпение и добри учители, да го одржиме изучувањето на македонскиот јазик на овие простори и да го имаме уште долго овој Одбор.
На Свеченоста говореше и младиот Филип Михајлов, млад говорник – мотиватор, кој им кажа на присутните дека иако е роден во Сиднеј, зборува шест јазици. “…Јас денеска зборувам како што сакам, а луѓето што зборуваат само еден јазик, зборуваат како што можат, рече Филип и им порача на учениците да го изучуваат мајчиниот јазик, затоа што тоа ќе им помогне да бидат поуспешни на повеќе полиња во животот.
Потоа гостите ја разгледаа богатата и огромна изложба на детски ракотворби, базирани на македонскиот фолклор и традиција, а беа прикажани и филмови што ги подготвија учениците и учителките во училиштата каде што се изведува македонскиот јазик.
