Од 31 јули до 6 август во Охрид по осумнаесетти пат се одржа Летната школа по македонски јазик, наменета за децата на македонските иселеници, во организација на Агенцијата за иселеништво. Оваа школа продолжува да биде важен мост меѓу Македонија и нејзината дијаспора, создавајќи нови генерации кои ќе го зборуваат, ќе го сакаат и ќе го пренесуваат македонскиот јазик и култура.
Педесетина деца, на возраст од 12 до 16 години, поминаа незаборавни денови на охридското крајбрежје, изучувајќи го македонскиот јазик и запознавајќи се со македонската култура, историја и традиција. Воедно, тие ги посетија културно-историските знаменитости на Охрид и регионот и создадоа нови пријателства со своите врсници од повеќе земји.
Оваа година школата за првпат се одржа под покровителство на претседателот на Владата на Република Македонија, Христијан Мицкоски. На свеченото отворање, Мицкоски истакна дека македонскиот јазик е најсилната врска што ги обединува Македонците, без разлика каде живеат.
„Школата има цел да им овозможи на младите генерации од дијаспората да го изучуваат македонскиот јазик, да ги запознаат нашата култура, историја и традиција и уште повеќе да ја зацврстат врската со својата татковина. Македонскиот јазик е нашиот идентитет, нашата култура и најсилната врска што нѐ обединува, без разлика каде живееме. Затоа, особено е важно најмладите да го негуваат мајчиниот јазик и да ја продолжат љубовта кон Македонија“, истакна Мицкоски.
Во текот на школата учениците имаа по два часа настава дневно, која ја реализираа професорките м-р Розита Закева и Ана Петровска. Со посветеност и современ пристап, тие придонесоа наставата да биде квалитетна, интересна и инспиративна за младите учесници.
Покрај изучувањето на особеностите на македонскиот јазик и стекнувањето комуникациски вештини, значајно внимание беше посветено и на историјата, културата и традицијата на Македонија.
Во рамките на наставата, на интерактивен начин беше одбележан и Илинден, еден од најзначајните датуми во македонската историја. Учениците имаа можност да се запознаат со историското значење на Илинденското востание и неговото место во колективната меморија на македонскиот народ.
Летната школа не се одвиваше само во училница. Учениците го посетија манастирскиот комплекс „Свети Наум Охридски“, а особено уживаа во пловењето со брод и во запознавањето со природните убавини на Охридското Езеро и неговото крајбрежје.
Секако, летните денови не можеа да поминат без пливање, сончање, дружење и заеднички активности. Токму тие моменти, покрај наставата, им овозможија на младите Македонци од различни делови на светот да се запознаат, да создадат пријателства и да почувствуваат дека, иако живеат далеку од татковината, се дел од една заедничка приказна.
Осумнаесеттата Летна школа по македонски јазик уште еднаш покажа дека мајчиниот јазик не е само средство за комуникација. Тој е чувар на идентитетот, културата и спомените и е една од најсилните врски што ги поврзуваат младите Македонци со нивната татковина, без разлика на тоа во кој дел од светот живеат.
