Светската здравствена организација (СЗО) соопшти дека официјалното име на болеста предизвикана од новиот коронавирус е КОВИД-19.
– Сега имаме име за оваа болест и тоа е ковид-19, објави шефот на СЗО, Тедрос Адханом Гебрејесус.
Бидејќи до производството на вакцината можат да поминат и 18 месеци, тој го повика светот да се бори против болеста најагресивно што може. Од ковид-19 досега починале над 1.200 лица, а околу од 50.000 се заразени.
Болеста која првпат беше идентификувана пред нова година во кинескиот град Вухан досега се нарекуваше коронавирус, но тоа всушност е име на цела група вируси, вклучувајќи го и САРС.
– Моравме да смислиме име кое нема да се однесува на ниедна географска локација, животно, поединец или народ и кое во исто време е лесно за изговор. Именувањето е важно, со цел да се избегне конфузија или да не се стигматизира цела една нација, додаде Гебрејесус. За именувањето на вируси е задолжен Меѓународниот комитет за таксономија на вируси, кој делува во рамките на СЗО.
Освен во Кина, новиот вирус е регистриран во уште 25 земји, при што најмногу заразени има во Јапонија ама тоа се главно лица од крузерот “Дијамантска принцеза” што се држи во карантин во пристаништето во Јокохама.
