Google во наредните недели ќе го оживее својот сопствен проект за портал за вести во Австралија и веќе нарачал реклами, велат уредници на неколку помали медиуми, истакнувајќи ги обидите на дигиталниот гигант да го поткопа најавениот закон.
News Showcase треба да започне веќе во февруари и е последниот тактички потег на Google во жестоката кампања против планираниот закон со кој австралиската влада сака да го принуди технолошкиот гигант да плаќа за употреба на медиумските содржини.
Уредникот на информативниот портал „ The Conversation”, Миша Кетчел, изјави дека тој бил контактиран од Гугл „за да продолжи со дискусиите за лансирање на производот News Showcase што е можно поскоро, најверојатно во февруари”.
Гугл го објави лансирањето на порталот во Австралија во јуни минатата година, потпишувајќи договори за испорака на содржини со седум мали локални медиуми, вклучувајќи го и „The Conversation”. Проектот бил одложен откако регулаторот за конкуренција објавил закон за исплата на содржините.
Целта на предложениот закон е да се зајакне позицијата на медиумите во преговорите со дигиталните гиганти за поделба на приходите. Предлогот предвидува арбитража во случај платформите и медиумите да не постигнат договор и одлуката на арбитражата да биде обврзувачка.
Портпарол на австралискиот огранок на Гугл одби да ги коментира информациите за лансирање на информативниот портал. Два австралиски весници потврдиле дека подготвиле детали за содржината на информативниот портал, без да разговараат со дигиталниот гигант.
Извршниот директор на „Гугл Австралија”, Мел Силва, на парламентарното сослушување минатата недела рече дека компанијата ќе го повлече пребарувачот од Австралија доколку се донесе законот.
„Гугл е против плаќање за објавување на врски до статии, не против плаќање за објавување на вести”, напиша Силва на блогот.
„Во моментов, ниту една веб-страница или пребарувач не плаќа за да ги упати луѓето на врски кон други страници”, напиша Силва во својот пост. „Овој закон ќе го смени тоа и ќе го принуди Гугл да плати за врски за прв пат во својата историја”.
Австралиската влада го објави законот во декември минатата година, по истрагата што ја покажа преголемата моќ на технолошките гиганти на пазарот во медиумскиот сектор.
Таквата состојба претставува потенцијална закана за демократијата, заклучи владата.
Истрагата, меѓу другото, утврди дека од секои 100 долари потрошени на рекламирање преку Интернет, 53 долари одат во „Гугл”, 28 долари во „Фејсбук”, а 19 долари во сите други медиумски компании.
