Од грчката опозиција побараа нивниот премиер Алексис Ципрас итно да го извести парламентот за последните случувања во разговорите за името.
Грчкиот министер без ресор, Алекос Флабурарис, ги повика коалиционите партнери во владата да не го спречуваат решението, за кое вели дека ќе се постигне многу брзо. Изјави дека се работи за „сложено име за внатрешна и надворешна употреба, со отстранување на иредентистичките претензии и промена на Уставот на соседната земја”.
Грчките медиуми шпекулираа и дека во договорот е сè затворено, со исклучок на договорениот распоред. Најавуваат еден вид на меморандум што ќе го продолжи спроведувањето на договорот во период од околу две години, за да се обезбедат заштитни мерки за исполнување на сите обврски што треба да ги преземе Македонија.
– Денеска го направивме решителниот чекор, рече во понеделникот шефот на грчката дипломатија во интервју за грчката телевизија „Контра”, коментирајќи го телефонскиот разговор меѓу двајцата премиери.
– Мислам дека денес го направивме решителниот чекор и утре ќе разговараат повторно двајцата премиери и ќе го завршат разговорот што го започнаа денес, рече шефот на грчката дипломатија во интервјуто и објасни дека „преговорите не се права линија тргнавме и одиме на маратон”, туку дека преговорите се „напорен пат со подеми, падови и тешкотии” и затоа Коѕијас вели дека е „потребно трпение и трезвеност”.
Во однос на европската и евроатланската перспектива на Македонија, Коѕијас рече дека со ратификуван договор во нашето Собранието, Грција ќе даде зелено светло на Самитот на министри за надворешни работи на ЕУ на 25 јуни, а ако се оди според планираното НАТО ќе достави покана за членство на нашата земја.
– Штом го имаме ратификувано договорот, да се надеваме дека ќе го имаме од нивното Собрание, како што ги решававме и прашањата што ги имаме со Албанија, ние со големо задоволство ќе дадеме „ок” за да тргнат по нивниот европскиот пат. Секако, доколку ги имаме навистина решено сите проблеми, ние треба да помогнеме и да ги поддржиме овие земји на нивниот европски пат, рече Никос Коѕијас.
Во однос на членството во НАТО објасни дека покана ќе може да се даде, ако се биде во ред, на Самитот на 11 и 12 јули, додавајќи дека по оваа покана ќе следуваат ратификации од сите земји членки.
Во однос на тоа кога договорот би пристигнал во грчкиот парламент, Коѕијас истакна дека потребно е да се завршат сите внатрешни процеси кај нас за да започне процесот за членство во ЕУ и НАТО, а потоа и Грција ќе го ратификува договорот за да стапи во сила.
