Претставата „Кралски игри” во режија на Љупчо Георгиевски во изведба на Народниот театар – Битола ја доби наградата за уметничко остварување на претстава во целина на 51. Меѓународен театарски фестивал „Војдан Чернодрински” во Прилеп, кој се одржа од 10 до 17 јуни.
Ѓорѓиевски е добитник и на наградата за режија на истата претстава. Наградите за главна женска и главна машка улога им се доделени на Катерина Аневска за улогата на Ана Бојен во „Кралски игри” и на Никола Ристановски за улогата на Подсекаљнов во претставата „Животот е прекрасен” во изведба на Македонскиот народен театар. Добитник на наградата за текст е писателот Венко Андоновски за текстот „Јов” во истоимената претстава во изведба на Драмски театар од Скопје.
Наградата за женска епизодна улога и е доделена на Билјана Драгиќевиќ-Пројковска за улогата на Серафима Илинчина во „Животот е прекрасен” додека добитник на наградата за машка епизодна улога „Димче Трајковски” е Кољо Черкезов за улогата на Контролорот во претставата „Ни ќар ни зијан” на Народниот театар „Антон Панов” од Струмица.
Драмски театар од Скопје е добитник на специјална награда за продукциска и сценска функционалност, додека наградата за современа драмска драматизација му е доделена на Русомир Богдановски за драматизацијата во „Ајнштајновите соништа” на Народниот театар „Војдан Чернодрински од Прилеп”. Добитник на наградата за кореографија и сценски движења е Кире Миладиновски за кореографијата и сценските движења во „Старицата од Калкута” на Театарот „Јордан Хаџи Константинов Џинот” од Велес, додека наградата за музика му е доделена на Горан Трајковски за музиката во претставата „Прометеј” во изведба на Турскиот театар од Скопје. Костимографката Розе Трајчева е наградена за костимите во „Ајнштајновите соништа”, додека Валентин Светозарев е добитник на наградата за сценографија во „Кралски игри”. Талија Настова ја доби наградата за млада актерка за улогата во „Старицата од Калкута”, додека наградата за млад актер „Трајко Чоревски” му е доделена на Марко Трајковиќ за улогата на Земљаника во претставата „Ревизор” во изведба на театарот од Куманово.
