Aвстралискиот авиопревозник „Квантас” постави нов рекорд откако успешно го комплетираше пробниот лет од Лондон до Сиднеј.
Авионот „боинг 787-9 дримлајнер” безбедно слета во Сиднеј по 19 часови и 19 минути, што е нов најдолг непрекинат лет на светот. „Двапати видовме изгрејсонце”, изјави извршниот директор на „Квантас”, Алан Џојс, откако излезе од авионот.
Патувањето долго 17.800 километри беше дел од проектот „Изгрејсонце”, во кој „Квантас” планира да воведе редовни комерцијални линии од Сиднеј, Мелбурн и Бризбејн до Лондон и Њујорк. Летот Сиднеј-Њујорк, долг 19 часови и 16 минути, успешно беше тестиран минатиот месец.
На новиот рекорден лет имаше само 52 патници, главно вработени во „Квантас”, врз кои биле спроведени низа тестови поврзани со спиењето, исхраната и физичките активности.
„Квантас” до крајот на годината треба да донесе одлука дали ќе почне со вакви ултра долги летови, кои би стартувале во 2022.
