Постојаните обиди различно да се чита и да се толкува договореното од 2 јуни и 15 јули ја налага и потребата од постојана странска медијација. Овојпат ниту присуството на еврокомесарот Јоханес Хан не придонесе да се надмине оваа етапа.
– Многу сум разочаран што не успеавме да изнајдеме решенија според претходните договори од јуни и јули годинава. Се уште има надеж да се најде решение и се надевам дека ќе биде препознаена сериозноста на ситуацијата. Но потребно е лидерство и одговорност за земјата и нејзината судбина. Ние не можеме да ја работиме работата на овдешните политичари. Ќе бидам среќен ако се испочитуваат договорените рокови, изјави во вторникот утрото околу 4 часот еврокомесарот за проширување Јоханес Хан.
Тој престојуваше во уште една непроспиена ноќ во Скопје. Преговорите на четирите политички партии, кои започнаа во понеделникот доцна попладне и траеја 12 часа.
Не можело да се постигне договор за неколку работи, а најмногу време се дебатирало околу законот за “бомбите” што го предлагаат ДУИ и ВМРО-ДПМНЕ и околу правото на вето на новите заменици-министри.
– Не ми е јасно како дури 8 часа дебатиравме за политичките “бомби”. Како некому може да му е поважно донесување на законот за “бомбите” од еврпската иднина на сите граѓани. Нашата позиција е дека не смее да има 5 години затвор за новинар или медиум ако објави материјал што е веќе слушнат од „бомбите”, изјави лидерот на СДСМ, Зоран Заев, по излегувањето од резиденцијата на ЕУ во Пржино.
Спорно било и правото на вето на замениците-министри. ВМРО-ДПМНЕ тврдела дека тоа е неуставно, додека СДСМ барал да се испочитува договореното.
– Се работи за право на вето за правни, финансиски и кадровски одлуки само во врска со изборите, тоа јасно го пишува во договорот од 15 јули, рече Заев.
Според него се може да се договори за 2 часа, доколку се сака. Инаку, СДСМ бара исполнување на договореното според зацртаните етапи: да се избере целосниот тим на специјалната обвинителка и да се постават новите министри и заменици-министри во Владата на Никола Груевски. Ако тоа не се постигне – тогаш значи нема повеќе договор.
Премиерот и лидер на ВМРО-ДПМНЕ, Никола Груевски, замина од резиденцијата на ЕУ без да даде изјава. Наместо него зборуваше пратеникот Илија Димовски.
– Не успеавме да имаме финален договор, иако имаше прогрес во приближување на ставовите за одделни теми. Разговаравме сериозно за законот за „бомбите”, како што беше предложен во Собранието, како и за законот за “свиркачите” и се согледуваа повеќе стандарди . Сепак, ќе треба да се направат повеќе напори за постигнување договор на овие теми, изјави Димовски.
Договорено е партиските работни групи да ги продолжат преговорите, ама веќе нема цврсти рокови. Остануваат неполни две недели до објавувањето на Извештајот на ЕК за напредокот на Македонија во европската агенда.
