Во недела, на 26 ноември, со почеток во 10:30 часот претпладне не го пропуштајте големиот Македонски фестивал на храната за 2017 година.
Организаторот МАСО (Македонско Австралиската организација на заедницата), Македонскиот Фестивал на Храната го организира познатиот собир во кој се ужива во Македонската храна и музика, по шести пат, во недела, на 26 ноември со почеток во 10:30 наутро. Годинава е избрана нова погодна локација во Footscray Park and Gardens која се наоѓа на Ballarat Road, во Footscray.
Дознаваме дека Дамјан Стојаноски, синот на починатиот фолк-пејач Војо Стојаноски ќе настапи на Македонскиот Фестивал на Храната во Фуцкрај, а тука ќе бидат и Македонските играорци од КУД Слобода од Аделаид. Тие оваа година ќе земат учество на Македонскиот Фестивал на Храната заедно со локалните друштва: “Светлост”, “Никола Карев”, “Јане Сандански” и “Бисер” од Џилонг.
Богатата традиција на македонската заедница ќе биде достојно прикажана со традиционална храна, музика и игра. Покрај забавата за возрасните како и минатите години, ќе има и многу разновидна занимација за децата.
