Амбасадорот на Република Македонија во Австралија, Веле Трпевски се јави со реакција во врска со обвинувањето и исмевањето на Македонците кои живеат во Австралија од страна на некои медиуми во РМ. Ви го пренесуваме текстот во целост:
Почитувани,
Веќе неколку дена следам како се прави погрешно толкување и класична злоупотреба на еден мој пост. Информацијата беше во контекст на првите неколку часа од отварањето на сметката и никако не треба да се толкува тенденциозно во моменти кога сите треба посветено да работиме да им помогнеме на настраданите од поплавите во Македонија. Сакам да истакнам дека сумата која е собрана до овој момент е навистина импресивна и ја отсликува хуманоста и солидарноста на Македонците од Австралија. Планирав редовно да известувам за собраните средства со цел поголема мотивација за донирање и транспарентност, меѓутоа сега само ќе ја објавам конечната сума по завршувањето на донаторската акција на 5 септември. Македонците во Австралија имаат неколку начини како може да донираат средства, но од искуство од минатата донаторска акција овој начин се покажа како најефикасен и најприфатлив бидејќи нема банкарски провизии а сите средства се внесуваат преку банка или електронски што не остава никаков простор за нетранспарентност или злоупотреба.
Истовремено сакам да им се заблагодарам на советите и градоначалниците на градовите Рокдејл и Квинбијан кои повторно, како и во 2014, донесоа одлука за директна донација, потоа на многуте македонски бизнисмени во Австралија кои одговорија позитивно на нашиот повик, на сите организации и здруженија кои отворија донаторски пунктови и организираат донаторски настани низ цела Австралија како и на сите добри луѓе кои секојдневно несебично донираат средства на сметката за донации.
На крај сакам да потенцирам дека без разлика каде се наоѓаме во светот, најважно е да останеме сплотени и посветени, за да не ја загубиме целта поради која ги правиме сите овие напори, односно да им подадеме рака на оние на кои во овие тешки моменти тоа им е најпотребно.
Веле Трпевски
Амбасадор на РМ
во Австралија
