Минатава недела се одржа дводневниот Самит Македонија што беше најавен како водечка регионална платформа за споделување на последните светски трендови во бизнисот, инвестициите, технолошките иновации и одговорното лидерство.
Шестиот самит “Македонија 2025” е завршен во Скопје со порака од организаторите дека земјата ќе продолжи да се развива и модернизира во склад со целите за напредок до 2025 година.
На дебатите беа разработени најдобрите практики на економски успешните мали земји, примери за успешно и инспиративно лидерство, технологии на идното време, значењето на медиумите и телекомуникациската индустрија, улогата на социјалните медиуми и платформи, развој на Македонија во регионален центар за паметни технологии, значењето на странските инвестции за земји како нашата, како и примери за „паметни” технологии и обновливи извори на енергија.
Премиерот Зоран Заев во четвртокот имаше средба со Мајк Зафировски, Џон Битов помладиот и Роберт Арсов, членови на Бордот на директори на „Македонија 2025″, невладина организација во која членуваат бизнисмени од дијаспората и менаџери од Македонија.
Заев на средбата порача дека Владата на Република Македонија се отвори кон сите кои можат да придонесат кон економски напредок на државата.
– Ја поздравуваме иницијативата на дијаспората и конкретното активирање на претставниците на групата МК 2025 во Македонија, што значи силен импулс за нови идеи, програми и инвестиции во државата, со цел успешно спроведување на реформите, посебно во иновациите и проектите од областа на образованието на менаџерите, истакна македонскиот премиер. Организаторите веќе најавија дека седмиот Самит Македонија 2025 ќе се одржи на 8 и 9 ноември 2018 година.
