Соединетите Американски Држави преговараат во Австралија да разместат дел од своите стратегиски бомбардери, изјави претставник на Пентагон, што значи дека би биле во дострел на спорното Јужно Кинеско Море, а ваквиот потег би можел да ги засили тензиите со Кина.
Распоредувањето би вклучувало бомбардери Б-1 и проширување на мисијата на бомбардерите Б-52, изјави полковникот Демиен Пикарт, портпарол на американските воздухопловни сили на Пацификот, истакнувајќи дека преговорите се во тек и дека сè уште не е донесена одлуката.
„Овие бомбардери ќе им овозможат на нашите воздухопловни сили да ги унапредат и зајакнат регионалните сојузи и да им обезбедат на воздухопловните сили и пацифичката команда средства за уверлив глобален удар и одвраќање за да се помогне во одржувањето на мирот и безбедноста во индо-азиско-пацифичкиот регион”, изјави Пикарт.
САД во моментов не спроведуваат летови на Б-1 бомабрдерите од Австралија, но повремено имаат мисии на Б-52. Ако успеат да постигнат договор со Австралија, тоа би ги приближило американските воздухопловни сили до спорното Јужно Кинеско Море и потенцијално би ја налутило Кина.
Кина смета дека има право на целото спорно море, но Брунеи, Малезија, Филипини, Тајван и Виетнам ги оспоруваат тврдењата на Пекинг.
