Многумина кои ја следат работата на собраниската Анкетна комисија за прислушувањата велат дека уште отсега се гледа оти работата ќе биде “труба”.
Веќе утре (среда) пред собраниската Анкетната комисија за прислушувањата ќе биде сослушан првиот сведок, но засега е неизвесно кој ќе биде тоа од шесте што ги предложија СДСМ и ВМРО-ДПМНЕ.
ВМРО-ДПМНЕ ги предложила Никола Груевски, Зоран Ставрески и Гордана Јанкулоска, додека СДСМ ги додал уште и Сашо Мијалков, Миле Јанакиески и Мартин Протуѓер. ДУИ и ДПА не предложиле сведоци.
Во Комисијата 8 членови се пратеници од ВМРО-ДПМНЕ, 4 од СДСМ, 2 од ДУИ, 1 од ДПА и еден е независен пратеник (Роза Топузова Каревска). ВМРО-ДПМНЕ веќе најави дека ќе бара сведочењата да бидат затворени за јавноста.
Според членот на Комисијата, Антонио Милошоски од ВМРО-ДПМНЕ, овие сведочења би требало да бидат зад затворени врати, затоа што, како што рече, целта е да се утврдат фактите и вистината, а не да се прави театар.
Претседателот на Комисијата, Петре Шилегов, изрази жалење што седниците на кои што ќе се сослушуваат сведоците ќе бидат затворени, со оглед на тоа што се очекува дека ВМРО-ДПМНЕ тоа лесно ќе го изгласа бидејќи има половина од членовите, плус двајца од ДУИ.
– За жал, ВМРО-ДПМНЕ јавно соопшти дека сослушувањето на сведоците ќе побара да биде надвор од очите на јавноста, односно да се случува на затворена седница. За нас ова не е изненадување, кој има што да крие ќе сака тоа да го крие до крај. Членовите на комисијата од СДСМ ќе се потрудат информациите кои ќе бидат изнесени на комисијата а кои не се класифицирани да бидат соопштени и по целосен наш ризик. Очигледно дека ВМРО-ДПМНЕ нема намера и не сака да биде спроведен Пржинскиот договор, а Анкетната комисија беше барање не само на СДСМ, туку и на меѓународните посредници, како и на целата јавност. Изборот е на Никола Груевски, изборот е на ВМРО-ДПМНЕ да се кријат во своите дупки, но ќе ги извади народот оттаму на 24 април. Не може да разбереме што е толку тајно и класифицирано во купувањето плацеви на Водно, во купувањето на 600.000 евра вреден мерцедес за да може децата да гледаат телевизија на седиштата и да имаат масажери, што има класифицирано во, се извинувам, тегнењето за уши на Циганите да гласаат кој е Индијанец во оваа држава. Овие луѓе не се ниту ВМРО-ДПМНЕ, туку само обична збирштина што се држи меѓу себе за да го сокрие криминалот – рече Шилегов.
Секој член на комисијата има право да повика до тројца сведоци. На сведокот има право да му постави по три прашања во траење од пет минути, а сведокот ќе има по пет минути да одговори на секое. Пратеникот, по прашањата има две минути да даде завршен заклучок. Сведоците покрај јавната покана добиле и писмени покани за да сведочат, а само треба да се изјаснат во кој период меѓу 9 и 15 декември им одговара да дадат изјава. Сведоците може и да решат да не одговорат на поканата, а како што рече Шилегов, на јавноста останува да суди зошто таа постапиле.
Според Деловникот, затворена седница на Анкетната комисија може да побара сведокот, како и таква одлука да донесе Комисијата кога ќе се изнесуваат класифицирани информации.
Во периодот од 7 декември до 22 јануари членовите на комисијата ќе ги посетат МВР, УБК, Специјалното обвинителство, Јавното обвинителство, Агенцијата за разузнавање и сите други институции и органи кои се поврзани со прислушувањето.
Членовите на Комисијата се договориле сите активности да ги завршат до 25 јануари, а најдоцна до 29 јануари да го подготват извештајот (и да се објави до 31 јануари) во кој треба да се утврдат околностите во кои се вршело прислушувањето, како и да се утврди политичката одговорност на оние кои биле вклучени во процесот.
