Американскиот претседател и претседателски кандидат Доналд Трамп и се обрати на јавноста од Белата куќа и рече дека е „ограбен” и дека се работи за лажни избори.
„Ако ги преброите законските гласови, јас лесно победувам. Ако ги преброите незаконските гласови, губам. Многу ливчиња пристигнаа по затворањето на избирачките места, со задоцнување. Бев измамен”, рече Трамп во обраќањето.
Тој рече дека ја предвиделе победата на Бајден во многу држави, но беше обратно.
„Го задржавме Сенатот. Освоив најголем број гласови во историјата од Хиспаноамериканци, Афроамериканци и Индијанци. Ова се лажни избори, морам да кажам. Победивме во многу места, а потоа, за чудо, работите започнаа да се свртуваат во корист на Бајден. Но, јас предвидов дека гласањето по пошта ќе биде измама”, рече Трамп.
Тој рече дека пресметале точно колку гласови им требаат, а потоа ги испратиле по пошта.
„Неверојатно е како сите гласачки ливчиња испратени по пошта придонесоа само за едната страна. Да не зборуваме за прекинување на пребројувањето на гласовите. Луѓето ми испраќаа пораки, никогаш не сум видел таква љубов, таква поддршка од граѓаните, но противниците сакаат да ги украдат избори, а ние не смееме да им дозволиме”, рече Трамп.
