Адвокатите на Трамп тврдат дека, според законот, претседателот не може да биде испитуван дури и ако застрелал некого на 5-та Авенија на Њујорк!? А камо ли да му се бараат финансиски извештаи или даночни пријави пред да стане претседател.
Трамп е првиот претседател по Ричард Никсон кој ги чува од објавување своите финансиски информации. За разлика од претходните претседатели, Трамп одбива да објави даночни пријави и други документи за неговите пари и активностите на неговата компанија за недвижнини.
Пресудата на Врховниот суд на САД од минатата седмица е втора голема пресвртна точка во бурниот претседателски мандат на Трамп. Неговите адвокати тврдеа дека Трамп уживал целосен имунитет за време на сесијата, а самиот Трамп ја нарече пресудата „лов на вештерки”.
„Пред 200 години овој суд утврди дека ниту еден граѓанин, па дури и претседателот, не е над должноста да достави докази при учество во кривична постапка. Денес, ние го потврдуваме тој принцип”, соопшти Врховниот суд.
Врховниот суд гласаше со конзервативно мнозинство (5-4), а двајца судии, Нил Горуш и Брет Каванах, се кандидати номинирани од самиот Доналд Трамп.
Самиот Трамп веднаш коментираше на Твитер со големи букви: „Ова е политички лов на вештерки!”
Комитетите побараа сметководствената фирма “Мазарс ЛЛП” и двете банки “Дојче Банк” и “Капитал Ен” да достават финансиски извештаи.
Во спорот Трамп тврди дека американскиот Конгрес немал валидна причина да ги побара тие документи затоа што тоа би ја загрозило приватноста на него и неговото семејство и ќе го одврати од функцијата претседател.
Адвокатите на Трамп во случајот во Њујорк тврдат дека претседателот е уставно имун од гонење додека е на должност.
Тие исто така се повикуваат на одредбите на Министерството за правда, според кои активниот претседател не може да биде обвинет или гонет. Во расправата, адвокатите на Трамп отидоа дотаму што тврдат дека според законот, судството не може да го испита претседателот, дури и ако застрелал некого на 5-та авенија на Њујорк.
Комитетот на Претставничкиот дом му издаде покана во април 2019 година на “Мазарс” да ги предаде податоците за финансиското работење на Трамп во последните осум години.
Во сведочењето на поранешниот адвокат на Трамп, Мајкл Коен пред Конгресот, тој рече дека Трамп ги надувал или намалил одредени ставки на своите финансиски извештаи од 2011 до 2013 година со цел да го намали данокот што требало да го плати.
Комитетот за финансии ја разгледува можноста за перење пари преку бизнисот со недвижнини, што исто така се однесува на компанијата на Трамп.
Во одделна истрага, Комитетот за разузнавање истражува дали бизнисот на Трамп паднал под влијание на странски влади или индивидуални странски државјани.
