Во Македонија беше одбележана тригодишнината од полноправниот прием на земјата во НАТО. Министерот за надворешни работи Бујар Османи објасни зошто земјата ѝ дава воена помош на Украина и изјави дека Македонија не може да остане неутрална и не ѝ дава на Украина оружје за таа да нападне друга држава, туку за да се брани.
– Русија ги има прекршено насилно и неоправдано основните принципи на меѓународното право и на меѓународното хуманитарно право, принципите на европската безбедносна архитектира кои што го одржуваат мирот во Европа во последните 75 години и во нашата држава. Нашите граѓани уживаат мир, зашто по Втора светска војна е воспоставен меѓународен ред и поредок, рече Османи.
Тој повтори дека овој државен став не е кон рускиот народ, туку кон агресивното однесување на Руската федерација и на власта таму која го загрозува светскиот мир преку рушење на основните принципи на кои се темели мирот во светот и во Европа.
– Украинските војници и украинскиот народ се борат и за нашиот мир и за нашите вредности. Ние, со фактот дека сме дел од системот на вредности во кој доминира почитување на суверенитетот и територијалниот интегритет на независните држави, владеење на правото, демократијата, човековите права, покажуваме дека сме на вистинскат страна на историјата и ќе продолжиме додека е потребно, рече Османи.
Според него, билатералните односи со Русија се многу помалку важни од загрозувањето на мирот кој започна „со ова агресивно однесување на Русија кое ја отвора и Пандорината кутија за слично донесување на авторитарни режими“.
Македонската воена помош за Украина се чини не прекинува. Македомнија е на четврто место во НАТО според донираните борбени системи и борбена опрема. Најновата етапа на македонската воена помош на Киев е во форма на 12 хеликоптери од советско производство од моделот „Ми-24“, а во неколку наврати претходно беа испратени 4 борбени авиони Сухои „Су-25“ и непознат број тенкови од моделот Т-72. Практично тоа се сите примероци од борбени авиони, јуришни хликоптери и тенкови што ги имаше АРМ.
Според универзитетскиот професор по безбедносни науки, поранешниот бригаден генерал Методи Хаџи Јанев, постојат политички, економски и оперативни причини поради која е донесена одлуката за донацијата на сите тие оружја.
– Како НАТО членка ние имаме страна во тој конфликт и оваа одлука е во склад со заложбите на НАТО но и со најновата изјава на генералниот секретар Столтенберг дека Алијансата ќе продолжи да и помага на Украина се додека за тоа има потреба. Второ – економски, екстремно е тешко да го одржувате ресурсот кој е истрошен. Не заборавајте дека имавме несреќа за која покрај останатото, имаше индиции (не тврдам дека е така) поради несоодветно одржување или истрошени ресурси и која нé чинеше човечки животи и тоа баш на борбена задача. А хеликоптерите “Ми-24“, на пример, за две години им истекуваат ресурсите и повеќе нема да може да бидат во употреба. Ќе моравме тогаш да бараме начин да се ослободиме, па и да платиме за тоа – посочува Хаџи Јанев.
