Македонката Ленче (Лин) Доневска од Сиднеј ќе ја претставува Австралија на претстојното Светско првенство во бенч-прес, кое ќе се одржи од 22 мај до 1 јуни во Тексас, САД.
Доневска е родена во Битола, и е долгогодишна и успешна спортистка со бројни достигнувања на меѓународната сцена. Во својата кариера таа има настапувано на различни светски натпревари, меѓу кои и Светското првенство во бразилско џиу-џицу, како и на Светското првенство во кревање тегови.
Особено значаен успех постигна во 2019 година, кога освои второ место на Светското првенство во бенч-прес за жени, со што се вброи меѓу најдобрите во својата категорија на глобално ниво.
Покрај тоа, Доневска има учествувано и на олимписки квалификации во борење, што дополнително ја потврдува нејзината сестраност и врвна физичка подготвеност.
Нејзиниот настап на претстојното светско првенство претставува уште една можност за афирмација не само на австралискиот спорт, туку и на македонската заедница во Австралија, која со децении дава значаен придонес во различни области, вклучително и спортот.
Со својата упорност, дисциплина и досегашни резултати, Ленче Доневска претставува вистински пример за успешна спортистка и инспирација за младите генерации.
Слика 1: Ленче (Лин) Доневска ќе ја претставува Австралија на 5-то Светско првенство во кревање тегови
