Престон Македонија освои вреден бод на гостувањето кај Саут Мелбурн, откако натпреварот од 21. коло на Националната Премиер лига на Викторија заврши без голови.
Пред бројната публика на стадионот „Лејксајд“ двете екипи одиграа динамичен и борбен натпревар со многу трчање и цврсти дуели. Шансите се редеа на двете страни, но ниту еден од противниците не успеа да ја пронајде вистинската завршница и да го скрши отпорот на ривалот. По изедначената игра и пожртвуваноста на двата тима, поделбата на бодовите беше најреален епилог.
За Престон Македонија сега следува уште поголем предизвик. Клубот годинава се пласира меѓу најдобрите 32 екипи во Купот на Австралија и веќе во вторник, на 21 јули, на домашниот стадион во Резервоар ќе го пречека составот на Њукастел Џетс, член на австралиската А-лига. Натпреварот започнува во 19:30 часот, а евентуалната победа би значела нов голем чекор кон национален успех во најмасовното фудбалско натпреварување во Австралија.
По куп-предизвикот, Престон Македонија се враќа на првенствените обврски. Во петок, на 24 јули, во рамките на следното коло од Националната Премиер лига на Викторија, ќе биде домаќин на Бентли Гринс. Средбата ќе започне во 20:30 часот.
