Свештеници, претставници на црковните општини и членови на македонската заедница присуствуваа на свечениот прием во Амбасадата во Канбера
Македонците во Австралија достоинствено и свечено го одбележаа 8 Септември — Денот на независноста на Македонија. Централното одбележување се одржа во Амбасадата на Македонија во Канбера, каде што се собраа претставници на македонската заедница од сите делови на Австралија.
На свечениот прием присуствуваа свештеници од Македонската православна црква – Охридска архиепископија, претставници на македонските православни црковни општини, претставници на Австралиско-сиднејската епархија, како и членови на македонски здруженија, организации и поединци од македонската заедница.
Настанот беше можност за заедничко чествување на еден од најзначајните датуми во поновата македонска историја, но и за потврдување на силната поврзаност на иселениците со својата татковина. Присуството на претставници од различни македонски организации и црковни општини уште еднаш покажа дека верата, јазикот, културата и националното паметење остануваат цврста основа врз која се гради единството на Македонците во Австралија.
Особено значење на свеченоста ѝ даде претставувањето на новоименуваниот македонски амбасадор во Австралија, Стојанче Китаноски. За него ова беше прво одбележување на Денот на независноста во Австралија во својство на амбасадор.
Во своето обраќање, амбасадорот Китаноски изрази благодарност за топлото добредојде и ја нагласи значајната улога на македонската заедница во Австралија. Тој посочи дека, иако далеку од татковината, Македонците остануваат обединети преку заедничката љубов кон Македонија, а македонските иселеници — со својата работа, посветеност и општествен придонес — секојдневно се нејзини достоинствени претставници.
Присутните му посакаа добредојде на амбасадорот Китаноски и успешно и плодотворно извршување на дипломатската мисија, со надеж дека во претстојниот период дополнително ќе се продлабочат односите и соработката меѓу Амбасадата и македонската заедница.
Свештенството и претставниците на македонските православни црковни општини го истакнаа значењето на Македонската православна црква – Охридска архиепископија во духовното, националното и културното обединување на Македонците на австралискиот континент. Македонските храмови во Австралија, покрај својата основна духовна мисија, со децении се средишта во кои се негуваат македонскиот јазик, традицијата, културата и врската со татковината.
Одбележувањето во Канбера помина во свечена и пријатна атмосфера. По повод Денот на независноста беа упатени искрени честитки до сите Македонци во татковината и во дијаспората, со желби за мир, единство, благосостојба и напредок.
